ចិន​៖ នាយកក្រុមហ៊ុន Sinovac Biotech លោក យិន វៃតុង (Yin Weidong) បាននិយាយប្រាប់ទូរទស្សន៍រដ្ឋចិនកាលពីថ្ងៃសុក្រម្សិលមិញនេះថា ចិនបានអនុម័តប្រើប្រាស់នូវវ៉ាក់សាំងបង្ការជម្ងឺកូវីដ-១៩ ប្រភេទស៊ីណូវ៉ាក់ (Sinovac) ក្នុងករណីបន្ទាន់ (Emergency Use) ទៅលើកុមារ និងមនុស្សវ័យជំទង់អាយុចន្លោះពី ៣ឆ្នាំ ដល់ ១៧ឆ្នាំ។ 

កន្លងមក ចិនបានចុះបញ្ជីការផលិតវ៉ាក់សាំងបង្ការ កូវីដ-១៩ ចំនួនជាង ៧២៣.៥លានដូសរួចទៅហើយ ក្នុងតម្រូវវការប្រើប្រាស់ក្នុងស្រុក និងនាំចេញទៅកាន់ប្រទេស និងដែនដីជាង ៤៦ផ្សេងទៀត។ យ៉ាងណាមិញ វ៉ាក់សាំងដែលបានផលិត និងប្រើប្រាស់កន្លងមកគឺចាក់បានតែទៅលើមនុស្សពេញវ័យចាប់ពី ១៨ឆ្នាំឡើងទៅប៉ុណ្ណោះ។ យ៉ាងណាមិញ ការអនុម័តនេះ លោក Yin បានបន្តបញ្ជាក់ថា ការអនុញ្ញាតឱ្យប្រើប្រាស់លើកុមារ ឬមនុស្សជំទង់នាពេលណានោះ អាស្រ័យលើអាជ្ញាធរសុខាភិបាលផ្ទាល់ជាអ្នកកំណត់។

គួរបញ្ជាក់ថា Sinovac ក៏ជាប្រភេទវ៉ាក់សាំងដែលកម្ពុជាកំពុងប្រើប្រាស់ផងដែរ រួមជាមួយវ៉ាក់សាំងពីរប្រភេទផ្សេងទៀតរួមមាន Sinopharm និង AstraZeneca ប៉ុន្តែមានការផ្តល់ជូនប្រជាពលរដ្ឋអាយុចាប់ពី ១៨ឆ្នាំឡើងទៅប៉ុណ្ណោះ៕